Fermingarfræðslan er einn umfangsmesti þátturinn í starfi safnaðarins. Því má öllum vera ljóst að fermingarbörnin og fjölskyldur þeirra setja sterkan svip á vetrardagskrá kirkjunnar. Prestar kirkjunnar hvetja foreldra að leiða fjölskyldur sínar til aukinnar þátttöku í safnaðarstarfi kirkjunnar á þessum sérstaka tíma í lífi fermingarbarnsins.

Fermingarfræðsla hefst samkvæmt stundaskrá 14. september.
Öll samskipti og upplýsingamiðlun fer fram í gegnum Abler forritið.

Samverur vetrarins

Fermingarfræðsla á mánudögum og miðvikudögum verður í Grafarvogskirkju, fræðslan á þriðjudögum er í Kirkjuseli, Borgum Spönginni samkvæmt stundaskrá, sem verður birt síðar.

Þemadagarnir eftir áramót verða laugardaginn 9. janúar, laugardaginn 6. febrúar og laugardaginn 6. mars kl. 9:30 – 12:30.
Með fyrirvara um breytingar.

Kynningarfundir eftir messu

Fermingarbörnum og fjölskyldum þeirra er sérstaklega boðið til messu sunnudaginn 13. september og sunnudaginn 20. september og er frjálst að mæta í aðra hvora messuna. Á eftir verður kynningarfundur um fermingarstarf vetrarins og loks Pálínuboð þar sem við biðjum alla að leggja eitthvað gott til á sameiginlegt veisluborð.

Fermingarferð í Vatnaskóg

Dagana 17. og 18. september er stefnt að dagsferð í Vatnaskóg með hópinn. Hópnum verður skipt upp og fer annar hópurinn 17. september en hinn hópurinn 18. september. Það er ekki skyldumæting í þessa ferð en við hvetjum eindregið til að börnin komin með.

Foreldrar þurfa að sækja um leyfi frá skóla vegna ferðarinnar.

Guðsþjónustur

Fermingarnámskeiðið samanstendur af vikulegum samverum í kirkjunni fram að áramótum, þremur þemadögum eftir áramót, ferð í Vatnaskóg og guðsþjónustum. Til þess að fermast þarf að mæta í samverurnar og í 14 guðsþjónustur yfir veturinn, sjö fyrir áramót og sjö eftir áramót. Guðsþjónustur eru alla sunnudaga í kirkjunni kl. 11:00 og í Kirkjuselinu í Borgum í Spönginni kl. 13:00. Fermingarbörn fá ekki stimpil fyrir að mæta í sunnudagaskóla þó þau séu velkomin þangað. Nokkrum sinnum yfir veturinn býðst fermingarbörnunum að taka sérstakan þátt í guðsþjónustunni (vera messuþjónar) og fá auka stimpla. Þau sem hafa áhuga á því hafa samband við þann prest sem hefur umsjón með hópnum þeirra. Með þessu móti er hægt að vera fljótari að safna þessum 14 stimplum. Hægt er að vera messuþjónn í messu sem umsjónarprestur hópsins er með.

Æskulýðsfundir í kirkjunni á þriðjudögum kl. 20:00

Æskulýðsfundir eru í boði fyrir fermingarbörn alla þriðjudaga kl. 20:00. Fjölbreytt dagskrá verður í boði. Þeim sem mæta reglulega gefst kostur á að taka þátt í Landsmóti æskulýðsfélaga í október og í Febrúarmóti í Vatnaskógi.

Veikindi og forföll

Ef fermingarbarn kemst ekki í tíma vegna veikinda er mikilvægt að hafa samband við prestinn sem hefur umsjón með hópnum. Það er hægt að láta viðkomandi prest vita með tölvupósti. Ef fermingarbarn kemst ekki í tíma af öðrum ástæðum er mikilvægt að láta vita og mæta í einhvern annan tíma í vikunni í staðinn. Í boði eru nokkrir mismunandi tímar í hverri viku þannig að yfirleitt er hægt að finna einhvern tíma sem passar.

Fermingar

Fermingarbörn og fjölskyldur þeirra skrá sig sjálf á fermingardaga. Hver skóli fær úthlutað ákveðnum fermingardögum en einnig er velkomið að velja daga sem merktir eru öðrum skólum.